“Уорнер Брос” кино компанийн шинэ бүтээл болох “Sinners” буюу “Нүгэлтнүүд” кино Хойд Америкийн кино театруудаас нээлтийн долоо хоногтоо 45.6 сая ам.долларын орлого олж, тэргүүлээд байна.
Найруулагч Райн Куглерын аймшгийн төрөл жанрын уг шинэ бүтээлд Холливудын жүжигчин Майкл Б.Жордан ихэр ах дүү хоёрын дүрийг бүтээжээ. Мөн уг киноны гол дүрүүдэд жүжигчин Хэйли Стейнфельд, Жак О’Коннелл, Делрой Линдо, Ли Жун Ли нар тогложээ.
Үйл явдал нь 1930-аад оны Америкийн өмнөд нутагт өрнөдөг энэхүү кино мөн шүүмжлэгчдээс өндөр үнэлгээ аваад байгаа юм. Кино шүүмжийн “Rotten Tomatoes” вэбсайт уг кинонд нэлээд өндөр буюу 98 хувийн үнэлгээ өгсөн бол “Cinemascore” вэбсайт “Нүгэлтнүүд” кинонд А үнэлгээ өгчээ.
Кино шүүмжлэгчид тус киног баялаг сэдэвтэй, гайхалтай өнгө будаг, зураг авалттай, жүжиглэлт болон найруулга сайтайгаас гадна мөн киноны хөгжмийг бичсэн Людвиг Гөранссоны бүтээлийг өндрөөр үнэлэн, магтан сайшаажээ. “Нүгэлтнүүд” кино Хойд Америкийн бүсийн кинотеатруудаас 45.6 сая ам.долларын орлого олсон бол олон улсаас 15.6 сая доллар буюу нээлтийн долоо хоногтоо нийт 61.2 сая ам.долларын орлого олсон байна.
Сонирхуулахад, “Нүгэлтнүүд” кино нь найруулагч Райн Куглер, жүжигчин Майкл Б.Жордан нарын тав дахь удаагийн хамтрал ажээ. Тэд өмнө нь “Fruitvale Station”, “Creed”, “Black Panther” болон “Black Panther: Wakanda Forever” гэсэн дөрвөн кинонд хамтран ажиллаж байжээ.
