Сүүлийн жилүүдэд гарсан хамгийн сонирхолтой бөгөөд аймшигтай цус сорогчийн тухай бүрэн хэмжээний кино хэмээн нэрлэгдээд байгаа “Sinners” кино нээлтээ хийсэн өдрөөсөө хойш ашиг орлогоороо “Box оffice”-ийг тасралтгүй тэргүүлсээр байна. Тодруулбал, тус бүтээл нь нээлтээ хийсэн хоёр дахь долоо хоногтоо 45 сая ам.долларын ашиг олсон нь эхний долоо хоногтойгоо харьцуулахад ердөө зургаан хувийн бууралттай байжээ. Энэхүү үйл явдал нь кино урлагийн түүхэнд ховорхон тохиох амжилтын нэгээр бүртгэгдсэн ба франчайз бус атлаа баярын улиралд ч гараагүй байж ийнхүү амжилттай байгаа нь үзэгчид төдийгүй кино шүүмжлэгчдийн анхаарлыг багагүй татаад байгаа юм.
Мэдээж “Sinners”-ийн гайхалтай амжилтад гол дүр бүтээсэн жүжигчид болон киноны зохиол нөлөөлсөн нь гарцаагүй. 19 дүгээр зууны төгсгөлд, нууцлаг уур амьсгалтай нэгэн жижиг хотод өрнөх аймшигт түүхийг өгүүлэх тус кинонд жүжигчин Майкл Б.Жордан хоёр дүрд буюу ихэр ах дүүсийн дүрийг бүтээсэн гэдгээрээ онцлог болжээ.
Кино шүүмжлэгчдийн таамаглаж буйгаар, хүчирхэг найруулга, өвөрмөц зохиол, жүжигчдийн гайхамшигтай тоглолт зэрэг нь “Sinners” киног ирэх “Оскар”-ын наадамд нэр дэвших магадлалтай болгож байна.
