“Disney” кино компани “Whimsy & Wonder” нэртэй үзэсгэлэн гаргахаар болсон бөгөөд уг үзэсгэлэнг компанийн шилдэг эмэгтэй аниматоруудын бүтээлүүдэд зориулах юм. Тус үзэсгэлэнг Испанийн Гран-Канари арал дээр зохион байгуулах “Animayo” хэмээх анимейшн фестивалийн нэг хэсэг болгон дэлгэх юм байна.
Үзэсгэлэнгийн үеэр 1950-иад оны үеийн “Disney” студийн сонгодог бүтээлүүд болох “Cinderella”, “Alice in Wonderland”, “Peter Pan” зэрэг кинонуудад тод өнгө, шинэ хэлбэрийг ашиглаж, нэвтрүүлсэн Мэри Блэрийн таталбар зургуудыг дэлгэн үзүүлэхээр болсон аж.
Түүнчлэн уг үзэсгэлэнд “Disney”-тэй хамтран ажилладаг орчин үеийн зургаан эмэгтэй зураачдын бүтээлийг дэлгэн харуулахаар болжээ. Тэдний дунд “Ralph breaks the internet”, “The princess and the frog”, “Zootopia” бүтээлүүдийн дүрслэлийг хариуцан ажилласан Лорелай Боле, Жози Тринидад нар болон “The lion King”, “Frozen” дээр ажилласан Лиза Кин нар багтжээ.
Үзэсгэлэнг тавдугаар сарын 7-10 өдрүүдэд дэлгэх юм байна.
