“Уорнер Брос” кино компанийн бүтээл болох “Sinners” буюу “Нүгэлтнүүд” кино сүүлийн жилүүдэд гарсан хамгийн сонирхолтой бөгөөд аймшигтай цус сорогчийн тухай бүрэн хэмжээний кино хэмээн нэрлэгдээд буй.
Найруулагч Райн Куглерын аймшгийн төрөл жанрын уг шинэ бүтээлд Холливудын жүжигчин Майкл Б.Жордан ихэр ах дүү хоёрын дүрийг бүтээжээ. Мөн уг киноны гол дүрүүдэд жүжигчин Хэйли Стейнфельд, Жак О’Коннелл, Делрой Линдо, Ли Жун Ли нар тогложээ.
Үйл явдал нь 1930-аад оны Америкийн өмнөд нутагт өрнөдөг энэхүү киног цахимаар үзэх боломжтой боллоо. Тодруулбал, “Sinners” киног маргааш /2025.06.03/-аас “Amazon Prime Video”, “Apple TV”, “Fandango at Home” зэрэг дижитал платформ дээр худалдан авч, түрээслэн үзэх боломжтой гэж “Warner Bros” мэдээлсэн байна. Харин 4K Ultra HD, Blu-ray, DVD форматаар ирэх долдугаар сарын 8-аас онлайн болон биетээр худалдаанд гарах аж.
