Өмнөд Солонгосын алдарт “Blackpink” хамтлаг “Jump” хэмээх шинэ уран бүтээлээ өнгөрсөн баасан гараг /2025.07.11/-т албан ёсоор олны хүртээл болсон. Харин цахимаар цацахаасаа өмнө долдугаар сарын 5-нд “Deadline” аялан тоглолтынхоо хүрээнд тайзнаа тус уран бүтээлийг анхлан толилуулсан юм.
Тэгвэл эл дуу цахимаар олны хүртээл болоод ганц ч хонолгүй 47 улсад “iTunes”-ын чартыг тэргүүллээ.
Энэхүү уран бүтээл нь хамтлагийн хоёр жил 10 сарын дараах анхны уран бүтээл юм. Тус хамтлаг хамгийн сүүлд 2022 оны есдүгээр сард “Born Pink” бүрэн хэмжээний цомгоо гаргасан билээ.
Ташрамд дурдахад, “Deadline” аялан тоглолт Өмнөд Солонгосын Гояан цэнгэлдэх хүрээлэнгээс эхэлсэн. Цаашлаад, Ази, Хойд Америк, Европын 13 улсын хэд хэдэн хотод тоглолт үргэлжилнэ. Хаалтын тоглолт ирэх оны нэгдүгээр сард Хонгконгийн Кай Так цэнгэлдэх хүрээлэнд болох юм.
