Америкийн MTV телевизээс зохион байгуулдаг “MTV Video Music Awards-2025” хөгжмийн наадмын хамгийн олон номинацид Леди Гага, Бруно Марс, Кендрик Ламар нар нэр дэвшжээ. Түүнчлэн Сабрина Карпентер, Ариана Гранде нар мөн олон шагналд нэр дэвшсэн уран бүтээлчдийн тоонд багтсан байна.
Энэхүү наадмын түүхэнд хамгийн олон буюу 30 цомыг тус тус хүртсэн Бейонсе, Тейлор Свифт нар энэ жил нэг номинацид нэр дэвшсэн нь “Оны шилдэг уран бүтээлч” төрөл юм. Өнгөрсөн жил тэдний хэн нь ч цомог гаргаагүй боловч мөн хугацаанд хоёулаа гайхалтай аялан тоглолтыг хийжээ. Т.Свифт өнгөрсөн жилийн наадмаас хамгийн олон шагнал хүртсэн уран бүтээлчээр тодорч, “Оны шилдэг уран бүтээлч” тэргүүтэй долоон шагналын эзэн болж байв.
Харин энэ жилийн хувьд Леди Гага 12, Бруно Марс 11, репэр Кендрик Ламар 10, Сабрина Карпентер 8 номинацид тус тус нэр дэвшсэн байна. Леди Гагагийн хувьд “Оны шилдэг уран бүтээлч”-ээс гадна “Mayhem” цомгоороо шилдэг цомог төрөлд өрсөлдөнө. Өдгөө 39 настай тэрбээр АНУ-д аялан тоглолт хийж байгаа юм.
Түүнчлэн Леди Гага болон Бруно Марс нарын хамтарсан уран бүтээл болох “Die With A Smile” дуу нь “Оны шилдэг дуу” төрөлд нэр дэвшсэнээс гадна уран бүтээлчид нь мөн “Оны шилдэг хамтрал”, “Шилдэг поп дуу”, “Шилдэг клип” шагналуудад нэр дэвшиж байна.
2025 оны VMA-д “Шилдэг кантри”, “Шилдэг поп уран бүтээлч” гэсэн хоёр номинаци шинээр нэмэгджээ. Энэ жилийн шагнал гардуулах ёслол ирэх есдүгээр сарын 7-нд Нью-Йорк хотын “UBS Arena”-д болно.
