“Mortal Kombat” видео тоглоомоос сэдэвлэсэн шинэ бүрэн хэмжээний киноны хоёрдугаар анги 2026 оны тавдугаар сарын 15-нд албан ёсоор нээлтээ хийхээр болжээ. Эхэндээ энэ оны аравдугаар сарын 24-нд гаргахаар төлөвлөж байсан ч студиудын зүгээс гаргасан шийдвэрийн дагуу хугацааг хойшлуулсан байна.
Киноны албан ёсны X хуудсанд “энэ тулаанд илүү үнэ цэнтэй цаг хугацаа, орон зай шаардлагатай” хэмээн тайлбарласан бол Deadline сэтгүүлийн мэдээлснээр, хаврын улиралд өрсөлдөөн багатай тул кино театруудад амжилт үзүүлэх боломж илүү байна гэж үзжээ.
Тус киноны трэйлер үзэгчдийн анхаарлыг үлэмж татаж, насанд хүрэгчдэд зориулсан хувилбар нь 24 цагийн дотор 106 сая хандалт авсан байна. Урьдчилсан үзүүлбэрүүдийн үнэлгээ өндөр байсан нь студид хуваарь өөрчлөх үндэслэл болж өгчээ.
Энэ удаагийн ангид жүжигчин Карл Урбан дахин гол дүрд тоглож, домогт Жонни Кейжийн дүрээр “Earthrealm”-ийг аврах үхлийн тулаанд оролцох түүх үргэлжилнэ. Харин эхний анги 2021 онд гарч, “Mortal Kombat” цувралыг дахин амилуулж байв.
Киноны зохиолч Грег Руссо өмнөх ярилцлагадаа уг төслийг гурван ангитай байхаар төлөвлөж байгааг дурдсан нь хоёрдугаар анги бүрэн хэмжээний цувралын гол зангилаа болох магадлалтайг илтгэж байна. Мөн шинэчилсэн кино хувилбаруудыг өмнөх видео тоглоомын адил төвөгтэй бус, шинэхэн үзэгчдэд хүртээмжтэй, логик бүтэцтэй байхаар зохиож буйг продюсерын баг онцолжээ.
“Mortal Kombat II” нь тулаант, адал явдалт кино сонирхогчдод төдийгүй уг франчайзийн үнэнч фенүүдэд хүлээлт үүсгээд байгаа бөгөөд хаврын box office-ийн гол өрсөлдөгчдийн нэг болон гарч ирэх төлөвтэй байна.
