Кино урлагийн зөвлөлийн ажлын алба нь “Улаанбаатар” олон улсын кино наадмын хүрээнд 2026 оны Берлиний олон улсын кино наадмын дэргэдэх Европын кино маркетад “Монгол кино төслүүд” танилцуулах арга хэмжээг зохион байгуулах гэж байна.
Тус үйл ажиллагааны үеэр Кино урлагийн зөвлөл нь сонгон шалгаруулалт зарлаж 2025 оны аравдугаар сарын 3-ны өдрийг хүртэл уран бүтээлчдийн материалыг хүлээн авчээ. Сонгон шалгаруулалтад нийт 12 төсөл материалаа ирүүлж, аравдугаар сарын 7-ны өдөр Кино урлагийн зөвлөлийн ажлын албаны хурлын танхимд урьдчилсан сонгон шалгаруулалтад төслүүдээ амжилттай танилцууллаа.
Эдгээр төслөөс шалгарсан найман төсөл эцсийн шатанд “Улаанбаатар” олон улсын кино наадмын Монгол кино төслүүд танилцуулах үйл ажиллагаанд оролцож, өөрсдийн төслөө кино наадмын олон улсын шүүгчдийн бүрэлдэхүүнд танилцуулах юм.
Шүүгчдийн үнэлгээний үндсэн дээр дараах төслүүдийг шалгаруулна. Тодруулбал, тэргүүн байрт нэг кино төсөл, онцлох кино төслүүдэд гурван гурван кино төслийг шалгаруулна.
Эцсийн шатанд шалгарсан уран бүтээлчид Берлиний олон улсын кино наадмын (Berlinale) дэргэдэх Европын кино маркетад (European Film Market, EFM)- оролцоход Кино урлагийн зөвлөлөөс дэмжлэг үзүүлэх юм байна.
