Анхдугаар Үндсэн хуулиа баталж, Бүгд Найрамдах Улсаа тунхагласны түүхт 101 жилийн ойг тохиолдуулан Монгол Улсын Ерөнхийлөгч Ухнаагийн Хүрэлсүх зарлиг гарган нэр бүхий эрхмүүдэд төрийн дээд цол, одон, медаль хүртээлээ.
Улсын драмын эрдмийн театрын ахмад уран бүтээлч, жүжигчин Б.Даваасүрэн Монгол Улсын Гавьяат жүжигчин цолоор шагнууллаа.
Б.Даваасүрэн нь 1974 онд УДЭТ-т жүжигчнээр орж ажилласнаас хойш 35 жил тасралтгүй тайз, дэлгэцийн урлагт ард түмний сэтгэл зүрхэнд хоногшиж үлдсэн олон дүрүүдийг бүтээн амилуулсан байна. Тэрээр театрын тайзнаа 100 гаруй гол ба туслах дүрүүд, 50 гаруй телевизийн бүтээлийн дүрүүд, мөн 50 гаруй уран сайхны киноны дүрүүдийг амжилттай бүтээсэн бөгөөд түүнийг соёл урлагийнхан “Туслах дүрийн мастер” хэмээн өргөмжилдөг билээ. УДЭТ-ын тайзнаа К.Гольдоний “Хоёр эзний нэг зарц” жүжгийн Труффальдино, В.Шекспирийн “Отелло” жүжгийн Родриго, “Гамлет” жүжгийн Бернард, Розенко, А.В.Чеховын “Цахлай” жүжгийн эмч Дорин, Н.Анкиловын “Цэргийн бэлэвсэн гэргий” жүжгийн Плетнев, Д.Мягмарын “Найрын ширээний ууц” жүжгийн Ойдов, Б.Лхагвасүрэнгийн “Атга нөж” жүжгийн Даридай Отчигин зэрэг дүрүүдийг бүтээжээ.
