“Зэв” фильмийн залуу уран бүтээлчид “МАД” уран сайхны кино бүтээснээ дөрөвдүгээр сарын 24-нөөс бүх кинотеатруудаар үзэгчдэд хүргэх гэж байна.
Адал явдалт “МАД” уран сайхны кинонд Тувагийн Ардын жүжигчин, ОХУ-ын Гавьяат жүжигчин, тайз дэлгэцийн хүчирхэг уран бүтээлч Эдуард Ондар дүр бүтээжээ. Түүхэн болон домгийн дүрүүдийг өөрийн дотоод хүч, харц, дуу хоолой, биеийн хэлэмжээр амилуулж чаддаг тэрбээр Монгол үзэгчдийн сэтгэлд “Говийн домог” киноны Иглэр хааны дүрээр тод үлдсэн билээ. Мөн тэрбээр “Чингис хааны түүх” түүхэн уран сайхны киноны гол дүрд тоглосныг Монголын үзэгчид андахгүй. Энэ удаа тэрбээр “Зэв” фильмийн залуусын уран бүтээлд өөрийн авьяас, хүч, амь сүнсээ шингээн оролцжээ.
Ташрамд дурдахад, “МАД” уран сайхны киноны найруулагчаар Б.Буянбат ажиллаж, дүрүүдэд “Маск” продакшны жүжигчин Ц.Ганзориг, “Орлон тоглогч”, “Надад ирээгүй хайр” олон ангит киноны дүрээрээ үзэгчдийн эчнээ танил болсон жүжигчин Ч.Түвшинтөгс, жүжигчин Б.Батмэнд, С.Хонгорхүү, “Эрхэм элч” продакшны жүжигчин С.Лхагвасүрэн, өнөө цагийн эсрэг дүрийн мастер Э.Батнямбуу, жүжигчин, загвар өмсөгч О.Амгаланбаатар, Улсын хүүхэд, залуучуудын театрын жүжигчин Т.Золжаргал, залуу уран бүтээлч А.Эгэлзаяа, Э.Төгөлдөр нар тогложээ.
