Хятад улсын Чюаньжоугийн Хүүхэлдэйн театрынхан Монголд анх удаа айлчлан тоглолтоо хүргэхээр болжээ. Энэ театр нь дорнын хүүхэлдэйн урлагийн үнэт өвийг хадгалан хөгжүүлж ирсэн уламжлатай аж. Тэдний үзүүлбэрүүд ЮНЕСКО-гийн Биет бус соёлын өвийн “Шилдэг туршлага”-ын бүртгэлд багтсан өндөр үнэлгээтэй юм.
Хоёр улсын соёлын найрсаг хамтын ажиллагааны хүрээнд зохион байгуулагдаж буй уг тоглолт ирэх тавдугаар сарын 9-нд Улсын хүүхэлдэйн театрын тайзнаа 11:00 болон 15:00 цагаас тоглогдох аж.
Тоглолтод утсан хүүхэлдэйн хөдөлгөөнөөр амилсан “Сэргэлэн сармагчин”, “Залуу насны зүүд” зэрэг бүтээлүүдийг толилуулна. Хятадын хүүхэлдэйн урлагийн нарийн ур хийцийг бүрэн харуулах онцлогтой. Мөн үзэгчдэд зориулсан тулааны урлагийн үзүүлбэрүүд багтжээ. “У-шу” нударган тулаан болон сүр жавхлант Арслангийн бүжгийг тайзнаа хослуулан хүргэх юм.
