“Дилов хутагт ба Оуэн Латтимор: Тив дамнасан өв” тусгай үзэсгэлэн Монголын Үндэсний музейд олны хүртээл болж буй. Энэхүү үзэсгэлэнг Америкийн Монгол судлалын төв, “Дилов хутагт” сан, Монголын Үндэсний музей, Монгол Улсын Үндэсний номын сан, Завхан аймгийн Засаг даргын Тамгын газар, Завхан аймгийн музей хамтран зохион байгуулсан юм.
Нээлтийн үеэр Оуэн Латтиморын ач охин Энн Латтимор Прайс Дилов хутагт Б.Жамсранжавын хэрэглэж байсан хөөргийг эх оронд нь буцаан ирүүлж буйгаа мэдэгдэж, Монголын Үндэсний музейн сан хөмрөгт шилжүүлэн өгсөн юм. Энэ хөөрөг хутагтын өвөрт Хятад, Энэтхэг, Тайвань, Америк зэрэг олон улс дамнан явсаар эцэс сүүлд нь эх орондоо ирж буй нь энэ ажээ.
