Монголын тайз, дэлгэц кино урлагт тод мөрөө үлдээсэн найруулагч Ичинхорлоогийн Нямгаваа таалал төгслөө.
Тэрбээр 1980 аад оноос эхлэн хурц содон бүтээлүүдээрээ олны анхаарлыг татсан театрын алдартай найруулагч байсан бөгөөд сүүлийн жилүүдэд АНУ-д гэр бүлээрээ амьдарч байсан юм.
Монголын театр киноны нэрт найруулагч тэрээр Москва хотын Театрын урлагийн дээд сургууль төгсжээ. Тэрбээр театрын тайзнаа Таагүрийн “Нүдэн золио”, В.Пановын “Гэнэн залуу нас”, Д.Фонвизины “Маанаг гайхал”, Л.Ванганы “Жирийн хүмүүс”, “Эмч нар” тэргүүтэй олон жүжиг найруулсан юм.
Мөн “Гарын таван хуруу” (1983), “Нандин эрдэнэ” (1986), “Үлгэр дууссан хойно” (1987), “Шүтээн” (1992), “Цахилж яваа гөрөөс” (1993), “Газар шороо мину зэ” (1997) зэрэг киног найруулан үзэгчдэд хүргэж байв.
Түүний найруулсан “Догшин хутагтын сахиус” (1998) кино нь Токио, Фүкүокагийн кино наадмаас тэргүүн шагнал хүртэж (1998) байлаа.
