ОХУ-ын Чита хотноо зохион байгуулагдсан Забайкалийн олон улсын кино наадам 13 дахь жилдээ амжилттай болж өндөрлөлөө. Энэ удаагийн наадамд найруулагч Б.Батдэлгэр оролцож, “Татар” хамтлагийн тухай өгүүлсэн уран сайхны киногоо олон улсын үзэгчдэд толилуулсан нь онцлох үйл явдлын нэг байлаа.
Энэ жилийн наадмын хөтөлбөрт хүмүүнлэг үзэл, хүний мөн чанар, ёс суртахуун, уламжлалт гэр бүлийн үнэт зүйлсийг хөндсөн бүтээлүүд түлхүү багтсан талаар зохион байгуулагчид онцолсон байна. Наадамд Монгол, Хятад, Сингапур, Турк, Унгар, Франц, Их Британи, Бангладеш, Вьетнам, АНУ, Япон, Герман, Чех зэрэг олон орны кино уран бүтээлчид оролцжээ.
Наадмын үеэр зөвхөн кино үзвэрээр хязгаарлагдахгүйгээр найруулагч, жүжигчид үзэгчидтэй нээлттэй уулзалт, ярилцлага өрнүүлж, уран бүтээлийн туршлагаасаа хуваалцсан нь үзэгчдийн сонирхлыг татсан байна.
