“Анхааралтай байхгүй бол бодит амьдралаас тасран ‘Backrooms’-д гулсан орох вий. Орох төдийд чийгтэй хивсний өмхий үнэр ханхалж, нэгэн хэвийн шар ханануудыг харах тусам дотор муухайрч, гэрлийн анивчих чимээ хангинан цаашлах тусам эцэс төгсгөлгүй хоосон өрөөнүүд үргэлжлэх болно…”
2019 онд 4chan.org веб хуудаснаа нэрээ нууцалсан хэрэглэгчийн бичсэн энэхүү жихүүцэм сэтгэгдлээс эхлэн цахим орчинд уг “сэдэв” асар хурдтайгаар мөн нээлттэйгээр тархаж эхлээд байв. 2022 онд VFX уран бүтээлч Кэйн Парсонс “Kane Pixels” нэр бүхий YouTube сувагтаа “he Backrooms” (“Found Footage”) нэртэй богино хэмжээний киног байршуулсан нь олон хүний анхаарал татаад зогсохгүй кино урлагийн томоохон тоглогчдын анхааралд өртөөд амжсан нь түүний кино урлагийн салбар дахь үнэмлэхүй амжилтын эхлэл болжээ.
Ийнхүү өдгөө 84 сая орчим үзэлттэй эл богино хэмжээний бүтээлээ бүрэн хэмжээний уран сайхны кино болгон найруулах гэрээг “А24” студитэй албан ёсоор байгуулахдаа Кэйн Парсонс найруулагч ердөө 19 настай байсан нь уг студийн хамгийн залуу найруулагчаар тодроод байна. Ердөө 10 сая ам.долларын төсвөөр бүтсэн уг кино дэлхийн хэмжээнд 300 сая ам.доллар давсан орлого олсон нь “A24” студийн түүхэнд уг амжилтыг үзүүлсэн анхны кино болоод зогсохгүй АНУ-ын бокс оффисыг тэргүүлсэн хамгийн залуу найруулагч болжээ. Энэхүү амжилт нь зөвхөн борлуулалтаас гадна Холливуудын том студийн тэрбум ам.долларын төсөвтэй блокбастер бүтээлүүдээс илүүтэй өндөр үнэлгээ авсан нь түүний амжилтыг улам бататгаад байна.
Холливуудын ертөнцөд сүүлийн жилүүдэд алдартай бүтээлүүдийн үргэлжлэл, дахин амилуулсан хувилбаруудыг давамгай бүтээж байсан бөгөөд “Backrooms”-ын хувьд цоо шинэ концепцтой буюу цахим орчин дахь задгай сэдвийг баяжуулан өндөр чанартай бүтээл болгосон нь үзэгчдэд өндрөөр үнэлэгдэж буй. “The Guardian” сэтгүүлийн кино шүүмжлэгч Питер Брэдшоу тус бүтээлийг “Аймшгийн киноны дүрмийг шинээр бичсэн, сэтгэл жихүүцэм шилдэг бүтээл” хэмээн сайшааж, ой санамжийн гажуудлыг дэлгэцнээ гайхалтайгаар амилуулсан тухай онцолжээ. Мөн шинэ үеийнхний бүтээлч сэтгэлгээг дэмжин ажиллахад гарч болох шинэлэг үр дүнг батлан харуулж буй Кэйн Парсонс зөвхөн үзэгчид гэлтгүй, бүтээлч салбарт ажиллаж буй залуучуудад урам өгч буй сэтгэгдлүүд цахим орчин дээр давамгайлаад байна.
