Хүүхэд багачууд, сурагчдын зуны амралт үргэлжилж буйтай холбогдуулан Ховд аймгийн Нийтийн номын сангийн хамт олон Буянт голын эрэг дээр “Гэр номын сан” ажиллуулж байна. Тус үйл ажиллагаа нь бага насны хүүхдийн дэлгэцийн хэрэглээг бууруулах, сурагчдын зуны амралт, чөлөөт цагийг зөв боловсон өнгөрүүлэх, ном унших дадал хэвшлийг дэмжих зорилготой юм.
“Гэр номын сан” ийнхүү тав дахь жилдээ үйл ажиллагаагаа явуулж байгаа бөгөөд “Зуны зугаатай уншлага” уриалгыг дэвшүүлжээ.
Хүүхэд, өсвөр үeийнхэн төдийгүй иргэд өдөр бүр 09:00–18:00 цагийн хооронд гэр номын санд зочлон нас, сонирхолдоо тохирсон олон төрлийн ном уншихын зэрэгцээ уламжлалт тоглоом наадгай тоглох, боловсрол, танин мэдэхүйн хөтөлбөрүүдэд хамрагдах боломжтой юм.
Гэр номын санд өдгөө 1500 гаруй ном дэлгэсэн байна. Зуны улиралд Ховд аймгийн Буянт голын эрэг дээр ажилладаг “Гэр номын сан”-гаар жилд дунджаар 3000 орчим хүн үйлчлүүлдэг. Үүний дийлэнх нь хүүхэд багачууд ажээ.
