“Arirang” нэртэй дэлхийг тойрох аялан тоглолтоо Хойд Америк даяар амжилттай хийж буй Өмнөд Солонгосын хөвгүүдийн хамтлаг BTS олны сэтгэлийг хөдөлгөж, орон нутгийн засаг захиргаа тэдэнд дээд түвшний хүндэтгэл үзүүлж, улаан хивс дэвсэн угтан авч байна.
Торонто хотын зөвлөл саяхан наймдугаар сарын 22-23-нд болох хамтлагийн тоглолтын өмнөхөн, наймдугаар сарын 21-нээс есдүгээр сарын 23-ны хооронд хотын Норт Йорк дүүрэгт байрлах Йонг гудамжны нэг хэсгийг түр хугацаанд “BTS булевард” гэж нэрлэхээР шийдвэрлэжээ. Тус зөвлөл мөн тоглолтын өдрүүдийг “BTS Weekend” хэмээн зарлахаар төлөвлөж байна.
Торонто хотын удирдлага гудамжны нэршил болон амралтын өдрүүдийн уриалгатай холбогдуулан BTS-ийн оюуны өмчийг ашиглах зөвшөөрөл авахын тулд агентлагтай нь холбогдсон гэж “BigHit Music”-ийн ажилтан мэдэгджээ.
BTS хамтлаг Лондон, Парис, Мюнхен зэрэг Европын хотуудад тоглолтоо амжилттай хийснийхээ дараа Хойд Америкт аялан тоглолтоо үргэлжлүүлж байгаа юм. Тус хамтлаг наймдугаар сарын 10, 11-нд Балтимор дахь “M&T Bank” цэнгэлдэх хүрээлэн, наймдугаар сарын 15, 16-нд Арлингтон дахь “AT&T” цэнгэлдэх хүрээлэн, наймдугаар сарын 22, 23-нд Торонтогийн “Rogers” цэнгэлдэх хүрээлэнд тоглолтоо толилуулахаар төлөвлөжээ.
Балтимор хот харьяалагддаг Мэрилэнд мужийн захирагч Вэс Мур тус хамтлагийг угтан авч буй дүрс бичлэгээ ням гараг /2026.08.09/-т нийгмийн сүлжээнд байршуулсан байна.
“Нэг зорилготой долоон залуу дэлхийг нэгтгэж, соёл, газарзүй болон хэлний саад бэрхшээлийг даван туулж явна. Үнэхээр гайхалтай” гээд гишүүн бүрийг нэрээр нь дурдаж, “Та бүхэн Балтимор хотод тавтай морилно уу. Мөн “BTS ARMY”-гийн бүх гишүүддээ хандан хэлэхэд “Хамтдаа шуугилдацгаая” гэжээ.
