Канадын алдарт дуучин Селин Дион ховор тохиолддог хөшүүн хүний хам шинж (stiff-person syndrome)-тэй тэмцэж буй энэ үедээ тайзнаа эргэн гарахын тулд эрчимтэй эмчилгээ, нөхөн сэргээх хөтөлбөрт хамрагдаж байгаагаа дэлгэлээ.
Өдгөө 58 настай дуучин “Harper’s Bazaa”r сэтгүүлд өгсөн ярилцлагадаа 2022 онд оношлогдсоныхоо дараа физик эмчилгээ, дуу хоолойн эмчилгээ, дархлааны эмчилгээ хийлгэж, шинэ эмчилгээний арга хэрэглэж эхэлсэн тухайгаа ярьжээ. Мөн тайзны бэлтгэлийн хүрээнд долоо хоногт гурван удаа 90 минутын пилатес хийж, балетын хичээлд тогтмол хамрагдаж байгаа аж.
Селин Дион өвчнийхөө шинж тэмдгийг албан ёсоор оношлуулахаасаа 17 жилийн өмнөөс мэдэрч эхэлсэн байна. Тухайн үедээ биеийн байдлаа бүрэн ойлгоогүй ч өвчин нь дуулах, алхах чадварт нь ноцтой нөлөөлдөг байсан аж. Эцэст нь эрүүл мэндийнхээ шалтгаанаар “Courage World Tour” аялан тоглолтоо цуцалж байв. Гэсэн ч дуучин нөхөн сэргээх эмчилгээнийхээ үр дүнд сүүлийн жилүүдэд тайзан дээр дахин гарч эхэлсэн. Тэрбээр 2024 оны Парисын олимпын нээлтийн ёслолд Эдит Пиафын “Hymne à l’amour” дууг дуулж, мөн Саудын Арабт болсон “Elie Saab”-ийн загварын шоунд оролцсон билээ.
Одоо Селин Дион энэ намар Парист тоглолтоо хийхээр бэлтгэж байна. Эхний 10 тоглолтын тасалбар богино хугацаанд дууссан тул фэнүүдийнхээ хүсэлт, эрэлттэй холбоотойгоор тоглолтын хуваарьтаа дахин нэг долоо хоног нэмжээ.
