2026-2027 оны хичээлийн жилийн эхлэлтэй зэрэгцэн “Монголын ирээдүй уншихад бэлэн байна” уриатай Ном уншлагын үндэсний хөдөлгөөн есдүгээр сарын 1-ний өдрөөс орон даяар эхэлнэ.
Энэхүү хөдөлгөөний хүрээнд хүүхэд, залуусыг ном унших дадал хэвшилтэй болгох, уншлагын орчин нөхцөлийг бүрдүүлэхэд чиглэсэн олон талт үйл ажиллагааг зохион байгуулах юм. Тухайлбал, нийслэлийн ерөнхий боловсролын 88 сургуульд ном унших орчин, нөхцөлийг бүрдүүлээд байна.
Мөн хөдөлгөөний дараагийн шатны үйл ажиллагааны нэг болох “Багштайгаа ангиараа уншъя” хөтөлбөрийг хэрэгжүүлнэ. Тус хөтөлбөрт бага, дунд, ахлах ангийн суралцагчид сургуулийн удирдлага, багш, эцэг эхийн дэмжлэгтэй хамрагдах юм.
Ингэснээр сурагчдын ном унших сонирхлыг нэмэгдүүлэхээс гадна тогтмол унших дадлыг төлөвшүүлж, уншлагын соёлыг сургалтын орчинд дэмжихэд чиглэж байна.
