“Sex and the City” цувралын Кэрри Брэдшоугийн дүрээр дэлхий дахинд алдаршсан жүжигчин Сара Жессика Паркер хүмүүс өөрийнх нь талаар хамгийн их ташаа ойлгодог зүйлийн талаар ярьжээ. Тэрбээр “British Vogue”-д өгсөн ярилцлагынхаа үеэр “Хүмүүс таны талаар ямар хамгийн том буруу ойлголттой байдаг вэ” гэсэн асуултад “Намайг Кэрри гэж боддог” хэмээн товч бөгөөд тодорхой хариулсан байна.
Сара Жессика Паркер 1998 онд нээлтээ хийсэн “Sex and the City” цувралд Нью-Йорк хотод амьдардаг зохиолч, загварын өвөрмөц мэдрэмжтэй Кэрри Брэдшоугийн дүрийг бүтээсэн юм. Гэсэн ч Паркер бодит амьдрал дээрх өөрийгөө Кэрри Брэдшоугаас эрс өөр хүн гэдгийг өмнө нь олон удаа онцолж байсан. Тэрбээр өөрийн болон Кэрригийн хооронд маш тодорхой зааг бий хэмээн тодорхойлж байжээ.
“Sex and the City” цуврал 2004 онд өндөрлөсөн ч Сара Жессика Паркер Кэрри Брэдшоугийн дүрдээ хэд хэдэн удаа эргэн ирсэн юм. Тэрбээр 2008 болон 2010 онд гарсан тус цувралын үргэлжлэл болох бүрэн хэмжээний хоёр кинонд тоглосон бөгөөд 2021 онд эхэлсэн “And Just Like That…” цувралаар мөн үзэгчидтэй дахин уулзсан.
