Холливудын нэрт жүжигчин Райан Гослинг “Warner Bros.”-той хамтран алдарт “The Flintstones” цувралаас сэдэвлэсэн уран сайхны кино хөгжүүлэхээр ажиллаж байна.
Шинэ төсөл нь “The Flintstones” цувралын алдарт дүр болох Бэмм-Бэмм Рабблд төвлөрөхөөр төлөвлөж байгаа аж. Тодруулбал, кинонд Бэмм-Бэмм насанд хүрсэн үеийнхээ дүрээр голлох магадлалтай байна.
Төслийг Райан Гослингийн “Open Invite Entertainment” продакшн “Warner Bros.”-той хамтран хөгжүүлж байгаа бөгөөд Жесси Хендерсон мөн уг төсөлд оролцож байна.
Одоогоор кино хөгжүүлэлтийн эхний шатандаа байгаа бөгөөд зохиолч, найруулагчийн сонгон шалгаруулалт үргэлжилж байгаа тухай эх сурвалжууд мэдээлжээ. Харин Райан Гослинг өөрөө тус кинонд жүжиглэх эсэх талаар одоогоор албан ёсны мэдээлэл гараагүй байна.
“The Flintstones” нь анх 1960-аад онд дэлгэцнээ гарсан, чулуун зэвсгийн үеийн амьдралыг хөгжилтэй байдлаар дүрсэлсэн дэлхийн хамгийн алдартай хүүхэлдэйн цувралуудын нэг юм. Тус бүтээлийг өмнө нь 1994 болон 2000 онд уран сайхны кино болгон дэлгэцнээ гаргаж байсан билээ.
