Холливудын нэрт жүжигчин Сандра Буллок алдарт “Practical Magic” киноны гуравдугаар анги бүтээгдэж магадгүй талаар байр сууриа илэрхийлжээ.
Тэрбээр удахгүй үзэгчдийн хүртээл болох “Practical Magic 2” кино амжилттай болбол цувралыг цааш үргэлжлүүлэх боломжтой хэмээн ярьсан байна. Сандра Буллок энэ удаагийн кинонд шинээр нэгдсэн залуу жүжигчид болох Жои Кинг болон Мэйси Уильямс нарыг онцолж, цаашид киноны гол түүхийг шинэ үеийн дүрүүдэд шилжүүлэх боломжтойг дурджээ.
“Practical Magic 2” кинонд Сандра Буллок болон Николь Кидман нар анхны киноны Оуэнс эгч дүүсийн дүрдээ дахин тоглож байгаа юм. Харин Жои Кинг, Мэйси Уильямс нар Оуэнсийн гэр бүлийн шинэ үеийн төлөөллийг бүтээж байна.
1998 онд дэлгэцнээ гарсан “Practical Magic” кино нь тухайн үедээ үзэгчдийн анхаарлыг татаж байсан бөгөөд олон жилийн турш үнэнч шүтэн бишрэгчидтэй болсон юм. Шинэ анги нь Оуэнсийн гэр бүлийн ид шидийн өв, хайр дурлал болон үе дамжсан хувь заяаны тухай түүхийг үргэлжлүүлэх аж.
