Францын алдартай импрессионист зураач Пьер-Огюст Ренуарын бүтээл болох хоёр уран зураг Францын өмнөд нутаг дахь нэгэн дүрслэх урлагийн музейгээс хулгайд алдагджээ.
Орон нутгийн хэвлэлүүдэд бичсэнээр, нийт хохирлын хэмжээ 9-10 сая евро болж байна.
Мягмар гарагт Францын өмнөд нутгийн Кань-сюр-Мер хот дахь Ренуарын музейд нээгдэхээс нь өмнө хэд хэдэн хүн хамгаалалтын хашлагыг эвдэн нэвтэрчээ. Дохиолол дуугарснаас хойш 5-хан минутын дараа цагдаа нар хэргийн газарт ирсэн боловч гэмт этгээдүүд хоёр зургийг хэдийн аваад явсан байв.
Хотын эрх баригчдын мэдээлснээр, хулгайд алдагдсан зургууд нь 1910–1913 оны хооронд туурвисан болох “Хатагтай Колонна Романогийн хөрөг” гэдэг алдартай тосон будгийн бүтээл, “Худгийн дэргэд зогсож буй бүсгүй” гэдэг 1886 онд туурвисан бүтээл байжээ. Кань-сюр-Мер хотын дарга Брайан Массоны ярьснаар, гэмт этгээдүүд дуулга, бээлий өмсөж, тулааны хувцас хэрэгсэлтэй байсан аж.
Одоогийн Ренуарын музей бол хамгийн сүүлд түүний урлан байрлаж байсан байшин юм.
Өнгөрсөн онд Парис дахь Луврын музейд хулгай гарснаас хойш Францын музейнүүдэд үзмэрүүдээ хамгаалах шинэ сорилт тулгарч байна.
