Нидерландын нэрт зураач Винсент ван Гогийн 60 гаруй жилийн турш олон нийтэд дэлгэн үзүүлээгүй уран зургийг үзэхээр Хонконгт олон зуун хүн дугаарлан зогсжээ. Уг бүтээл “Sotheby’s” ордноос Нью-Йорк хотноо удахгүй зохион байгуулах дуудлага худалдаагаар 180 сая ам.долларын үнэ хүрэх төлөвтэй байна.
Дэлхийн эдийн засгийн тодорхойгүй байдал үргэлжилж байгаа хэдий ч цуглуулагчид ховор, үнэ цэнтэй бүтээлүүдийг худалдан авахаар өрсөлдсөөр байгаа тул ирэх сарын 18-нд болох уг дуудлага худалдаа нь үнэ цэнтэй урлагийн бүтээлийн зах зээлийг сорьсон үйл явдал болно.
“Châtaigniers en fleurs” буюу Цэцэглэж буй туулайн бөөр модод хэмээх энэхүү бүтээл нь Ван Гог амьдралынхаа сүүлийн өдрүүдийг өнгөрүүлсэн Францын Овер-сюр-Уаз тосгонд туурвисан хамгийн сод бүтээлүүдийн нэг юм. Тэрбээр уг бүтээлээ 1890 оны тавдугаар сард зурсан бөгөөд үүнээс хоёр сарын дараа буюу 1890 оны долоодугаар сард 37 насандаа таалал төгсжээ.
Нью-Йорк дахь “Sotheby’s” дуудлага худалдааны ордны орчин үеийн болон контемпорари урлагийн газрын мэргэжилтэн Скотт Ничел хэлснээр, уг зураг дуудлага худалдаагаар зарагдсан Ван Гогийн бүтээлүүдийн үнийн дээд амжилтыг тогтоох төлөвтэй байна. “Энэхүү бүтээл нь зураачийн ер бусын өөдрөг үзэл, оргилуун эрч хүч, урам зориг, хүсэл тэмүүлэл, өнгө будгийн баялаг илэрхийллээрээ түүний уран бүтээлийн онцгой үеийг харуулдаг” гэж тэрбээр хэлсэн байна.
Ван Гог Францын Сен-Реми-де-Прованс хот дахь сэтгэцийн эмнэлгээс гарсныхаа дараахан Овер-сюр-Уаз тосгонд амьдралынхаа сүүлийн үеийн бүтээлүүдийг туурвисан билээ. Энэ үед зурсан бүтээлүүд нь дуудлага худалдаанд тун ховор гардаг тул удахгүй болох худалдаа урлагийн бүтээл цуглуулагчид, музейнүүд болон хөрөнгө оруулагчдын анхаарлыг татах төлөвтэй байна.
“Би энэ зургийн талаар өмнө нь огт сонсож байгаагүй учраас өөрийн нүдээр үзэхээр ирсэн” гэж 50 настай урлаг сонирхогч Ли Шаньшань ярьжээ. Тэрбээр уг бүтээлийг үзэхээр Хятадын Шэньжэнь хотоос хоёр цаг хагас орчим замыг туулан ирсэн байна.
Цэцэглэсэн асар том туулайн бөөр моддыг дүрсэлсэн уг зурагт цэцгээр бүрхэгдсэн млдны саглагар мөчир зургийн гол илэрхийлэл ажээ. Энэхүү бүтээлийг олон жилийн турш олны хүртээл болоогүй 12 уран зургаас бүрдэх цуглуулгын хамт худалдах бөгөөд уг цуглуулгад Поль Сезанн, Клод Моне нарын бүтээлүүд багтжээ.
Ван Гогийг нас барсны дараа “Цэцэглэж буй туулайн бөөр модод” зураг түүний дүү Теогийн эзэмшилд шилжжээ. Харин дараа нь Теогийн бэлэвсэн эхнэр Йоханна ван Гог-Бонгер болон тэдний хүү Винсент Виллем ван Гогт өвлөгдсөн байна.
