“Надад нэг галзуу санаа байна!” хэмээн хэлэх амархан. Харин бүтээлч санаагаа бодит ажил болгож, шилдгээ тодруулахын тулд бусадтай өрсөлдвөл ямар байх бол? Энэ асуултад хариулах маркетинг, зар сурталчилгааны чиглэлийн шинэ реалити шоу “On Brand Mongolia” Монголын үзэгчдэд хүрэхээр болжээ.
“Central” телевиз АНУ-ын “NBCUniversal Formats” компанитай хамтран тус шоуг Монголд албан ёсны эрхтэйгээр бүтээж байна. Нэвтрүүлэгт салбар бүрээс шалгарсан 10 оролцогч Монголын брэндүүдийн өгсөн даалгаврыг гүйцэтгэж, шинэлэг санаагаа бодит маркетингийн кампанит ажил болгохын төлөө өрсөлдөх юм.
“On Brand” нь анх АНУ-д бүтээгдсэн бөгөөд Монгол хувилбар нь тус форматын АНУ-аас гадуурх анхны олон улсын хувилбар болж байгаагаараа онцлог. Нэвтрүүлэг нийт 10 дугаартай, дугаар бүр 60 минут үргэлжлэхээр төлөвлөгджээ. Нэвтрүүлгийн эхний дугаар ирэх ням гараг буюу аравдугаар 25-нд цацагдах аж.
Монгол хувилбарын хөтлөгчөөр Г.Анхбаяр ажиллах бол хамтран хөтлөгчдөөр “Юнител” группийн маркетинг хариуцсан дэд захирал А.Энхчимэг, “Brainstorm” агентлагийн үүсгэн байгуулагч, гүйцэтгэх захирал Б.Одбаяр нар ажиллахаар болжээ.
Шоуны оролцогчид брэндүүдээс өгсөн даалгаврын хүрээнд богино хугацаанд маркетингийн стратеги, сурталчилгааны санаа боловсруулж, түүнийгээ танилцуулна. Шилдэг санаануудыг сонгон авч, багийн хүрээнд бодитоор хэрэгжүүлэх бөгөөд дугаар бүрийн ялагч тодорно. Улмаар нийт 10 дугаарын төгсгөлд шилдгийн шилдэг нэг оролцогчийг шалгаруулах юм.
Энэхүү шоу нь зөвхөн маркетингийн салбарын мэргэжилтнүүдэд бус, бүтээлч сэтгэлгээтэй, шинэ санаагаа бодит ажил болгох хүсэлтэй хүн бүрд боломж олгох зорилготой. Ингэснээр үзэгчид сурталчилгааны санаа хэрхэн төрж, стратеги болон хувирч, улмаар олон нийтэд хүрэх бодит кампанит ажил болдгийг дэлгэцээр үзэх боломжтой болох юм.
