Аймшгийн төрлийн алдарт “A Quiet Place” кино цувралын гуравдугаар анги болох “A Quiet Place Part III” кинонд жүжигчин Жек О’Коннелл, Киллиан Мёрфи нар ах дүүсийн дүр бүтээхээр болжээ. Кино 2027 оны долоодугаар сарын 30-нд нээлтээ хийхээр төлөвлөгдсөн байна.
Жек О’Коннелл энэ тухай “Collider” хэвлэлд өгсөн ярилцлагадаа дурджээ. Тэрбээр өмнө нь “28 Years Later: The Bone Temple”, “Sinners” зэрэг бүтээлээрээ үзэгчдийн анхаарлыг татсан бол Киллиан Мёрфи “Oppenheimer”, “Peaky Blinders” зэрэг кино, цувралаар дэлхий даяар танигдсан жүжигчин юм.
Киноны зохиол, найруулга болон продюсерын ажлыг цувралын өмнөх ангиудын гол уран бүтээлчдийн нэг Жон Красински дахин хариуцахаар болжээ. Мөн жүжигчин Эмили Блант өмнөх ангиудад бүтээсэн Эвелин Эбботтын дүрдээ эргэн тоглохоор болсон байна.
“A Quiet Place” цуврал нь дуу чимээгээр ан хийдэг харь гаргийн амьтдаас амьд үлдэхийг хичээж буй хүмүүсийн тухай өгүүлдэг. Эхний хоёр анги гэр бүлийн амьд үлдэх тэмцэл, айдас түгшүүрийг дуу чимээний өвөрмөц шийдэлтэй хослуулснаараа үзэгчдийн сонирхлыг татсан юм.
Гуравдугаар ангийн үйл явдлын дэлгэрэнгүй мэдээлэл одоогоор бүрэн ил болоогүй ч Киллиан Мёрфи, Жек О’Коннелл нарын дүрүүд ах дүүсийн холбоотой байх нь киноны үйл явдалд чухал байр суурь эзлэх төлөвтэй байна.
