Холливудын нэрт жүжигчин, Английн тайз, дэлгэцийн урлагийн домогт төлөөлөгч Сэр Иан Маккеллен дотнын найз Сэр Патрик Стюартын гэгээн дурсгалд зориулан фэйсбүүк болон инстаграм хуудсандаа дурсамжаа хуваалцжээ.
Түүний найз, Холливудын нэрт жүжигчин, Английн тайз, дэлгэцийн урлагийн домогт төлөөлөгч, Сэр Патрик Стюарт аравдугаар сарын 28-ны лхагва гарагт 86 насандаа таалал төгссөн юм.
Сэр Иан Маккеллен нийтлэлдээ, “Юуны өмнө Патрик бол Английн хойд хэсэгт орших, өөрийнх нь насан туршдаа хайрлаж, бахархаж явсан Йоркшир мужийн уугуул хүн байлаа. Түүний аялгатай яриа, бодол санаа, мэдрэмжээ шулуухан илэрхийлдэг зан чанараас нь Йоркшир хүний мөн чанар тод харагддаг байсан юм. Йоркширийн эрчүүд үнэнийг таллаж хэлэх, чухал асуудлаас бултахыг тэвчдэггүй. Патрик сэтгэл хөдлөлөө нуулгүй илэрхийлдэг хүн байсан нь түүнийг итгэж болохуйц, биширмээр, миний хувьд бүр хайрлаж явдаг хүн болгосон юм.
Бид хагас зуун жилийн өмнө “Royal Shakespeare Company”-д хүсэл тэмүүлэл дүүрэн залуу жүжигчид байхдаа анх танилцсан ч нэг жүжигт хамт тоглож байгаагүй. Түүний тухай миний хамгийн тод дурсамжуудын нэг нь хэдэн жилийн дараа Лондон хотын төвд гудамжинд тааралдсан үе юм. Тэр надад “Star Trek” цувралын гол дүрд тоглох санал хүлээн авснаа ярьж билээ.
Би түүнд “Гэхдээ Патрик минь, Их Британид бий болгосон тайзны жүжигчний карьераа бодооч. Холливудад очоод олон жил сураггүй болох эрсдэлтэй нүүр тулахыг үнэхээр хүсэж байна гэж үү?” хэмээн хэлж байлаа.
Гэвч тэр эрсдэл хийсэн. Тэр шийдвэрийг гаргасанд нь бид бүгдээрээ талархах учиртай. Зөвхөн түүний үнэнч “Star Trek”-ийн шүтэн бишрэгчид төдийгүй кино, театрын үзэгчид ч үүний үр шимийг хүртсэн юм. Тэрбээр олон улсын хэмжээний од болсон нэр хүндээ ашиглан “X-Men” зэрэг амжилттай кинонуудад тоглохоос гадна Шекспир, Ибсен, Артур Миллер, Питер Шаффер, Харолд Пинтер, Сэмюэл Беккет нарын сонгодог жүжгүүдэд гайхалтай дүр бүтээж байв. Тэрээр Стратфорд-апон-Эйвон, Лондонгийн “West End” болон Бродвейн тайзнаа үзэгчдийг бишрүүлсэн юм.
Америк бол түүний сонгож, эх орноо болгосон газар байлаа. Тэнд тэрбээр хайртай Саннитэйгээ учирч, Санни нь өвдөхөд ч, эрүүл байх үед ч, амьдралын сайн муу бүх цагт нь халамжлан түшиж байв. Гэсэн хэдий ч Патрик өөрийн уг гарал, эх орныхоо үндсийг хэзээ ч мартаагүй.
Атлантын далайн хоёр эрэгт өөрийн үеийн хамгийн хүндлэгдэж, хайрлагдсан жүжигчдийн нэг болсон түүний хамгийн их бахархдаг амжилт нь Йоркшир дахь Хаддерсфилдийн их сургуулийн канцлераар томилогдсон явдал байлаа.
Түүний сүүлчийн дэлгэцийн дүр болох “Avengers: Doomsday” киноны тоглолтыг бид хараахан үзээгүй байна” хэмээн бичжээ.
View this post on Instagram
