“Чингис хаан” үндэсний музейн дэргэдэх “Хаан” найрал чуулгын уран бүтээлчид энэ гуравдугаар сарын 4-6-ны өдрүүдэд ХБНГУ-ын Берлин хотноо зохион байгуулагдсан “ITB BERLIN 2025” дэлхийн аялал, жуулчлалын томоохон үзэсгэлэнд Монгол улсынхаа үндэсний өв, соёлыг сурталчлан оролцлоо. Монголын соёлын өв уламжлал, хөгжмийн гайхамшгийг “Их Монгол”, “Адуу хураах дуу” зэрэг бүтээлүүдээрээ харуулж, Монголын хаадын ёслолын бүжгийг толилуулж, ирсэн зочдын мэлмийг баясгаж, сонорыг мялааж, сонирхлыг татаж чадлаа.
Мөн энэ үеэр Берлиний алдарт музейн арал дээрх Симон галлерейд тоглож, (2025.03.07-08) монгол үндэсний урлагаа сурталчлан уламжлалт урлагийн тоглолтоо үзүүлж, Герман улсад суугаа монголчууд болон тус улсын улс төр, эдийн засаг бизнес, урлаг соёл, хэвлэл мэдээллийн нэр хүндтэй төлөөлөгчид үзэж сонирхсон байна. “Хаан” найрал чуулгын удирдаачаар Р.Ганбат, чуулгын хөгжимчид, бүжигчид, уртын дуучин оролцож, тоглолтын куратороор Монгол улсын соёлын элч Ц.Гэрлээ ажиллав.
“Хаан” найрал чуулга нь Монголын найрал хөгжим, хамтлагуудын дунд хамгийн залуу бүтээлчидтэй бөгөөд, эх орныхоо түүхээ судлан хамгийн эртний хөгжмийн зэмсгүүдийг тоглож, соёлын өв уламжлалаа толилуулдагаараа ялгардаг билээ.
Дашрамд сонирхуулахад, “ITB BERLIN 2025” үзэсгэлэнд 170 гаруй орны 5800 гаруй байгууллага оролцож, Монгол Улсаас аялал жуулчлалын байгууллагын төлөөллүүд оролцсон аж.
