Сүүлийн өдрүүдэд сошиал хэрэглэгчид ChatGPT-гийн зураг үүсгэх хэрэгслийг ашиглан алдарт “Ghibli” студийн стильтэй зураг үүсгэх болсон. Тэгвэл “Ghibli” эффектийн улмаас ChatGPT-гийн хэрэглэгчийн өнгөрсөн долоо хоногт маш их хэмжээгээр нэмэгдэж рекорд тогтоосон байна. Үүний улмаас серверүүд нь гацаж эхэлсэн тул “OpenAI” компани тэрхүү зураг үүсгэх хэрэгслийг түр хугацаагаар хязгаарлажээ.
Японы алдарт найруулагч Хаяао Мияазаки үүсгэн байгуулсан “Ghibli” студи нь “Spirited Away”, “Howl’s Moving Castle”, “My Neighbor Totoro” зэрэг алдартай анимэ кинонуудыг бүтээж байсан. “Similarweb” сайтаас харвал тус студийн эффектээр зураг үүсгэж эхэлснээс хойш ChatGPT-г идэвхтэй хэрэглэгчдийн тоо энэ жилд анхны удаа 150 сая хүрсэн аж. “OpenAI” компанийн гүйцэтгэх захирал Сэм Алтман даваа гарагт /2025.03.31/ Х платформ дээр бичихдээ “Бид сүүлийн нэг цагийн дотор нэг сая хэрэглэгч шинээр нэмсэн” гэсэн байна.
“SensorTower” сайтын мэдээллээс харвал идэвхтэй хэрэглэгч, аппликейшнийг нь татан авч буй тоо, аппликейшн доторх захиалгын орлого өнгөрсөн долоо хоногт түүхэн дээд хэмжээндээ хүрчээ.
