Алдарт найруулагч, жүжигчин, кино зохиолч Чарли Чаплин энэ өдөр мэндэлжээ

Түүний эцэг Чарльз Чаплин Сениор Лондон хотод чамгүй алдартай дуучин байсан ч архинд орж, амьдралаа алдаж, хожим гэрлэлтээ цуцлууж байв. Ийнхүү эцэг, эх нь салсны дараа Чарли Чаплин өөрийн дүүгийн хамтаар асрамжийн газарт хүргэгдэж байсан удаатай.

Ийнхүү амьдралын хүнд хэцүүг балчир наснаасаа туулсан Чарли хүү уншиж, бичих чадвар дутмаг байснаас үүдэн сургууль завсардаж, 14 наснаасаа театрт туслах жүжигчин хийж амьдралаа залгуулж эхэлжээ.

“Шерлок Холмес” жүжгийн шууданч хүү Биллигийн дүрээрээ танигдсан Чарли Чаплин хийл хөгжимд шамдан суралцахын зэрэгцээ театрын урлагийн талаар мэргэжлийн заавар, зөвлөгөөг найз нөхдөөсөө харамгүй авдаг байсан гэдэг.

1908 онд Чарли Чаплин инээдмийн жүжигчин, алиалагч хийх болсон нь амжилтад хүрч, ердөө 19 насандаа Их Британи даяар алдаршиж чаджээ. Хожим 1923 онд Чарли Чаплин Мери Пикфорд, Дуглас Фейрбанкс, Девид Гриффит нарын хамтаар “United Artists” студийг байгуулж өндөр чанартай хальсаар кино уран бүтээл туурвих эхлэлээ тавьжээ. Кино студи байгуулсан Чарли Чаплин тухайн жилдээ “A Woman of Paris” нэртэй киноны зохиолыг бичиж, үзэгчдийн хүртээл болгожээ.

Түүнчлэн 1925 онд “The Gold Rush”, 1928 онд “The Circus”, 1931 онд “City Lights”, 1936 онд “Modern Times”, 1940 онд “The Great Dictator” тэргүүтэй олон арван кино бүтээжээ. Кино шүүмжлэгчдийн зүгээс түүний туурвисан хамгийн шилдэг уран бүтээлээр 1931 онд үзэгчдийн хүртээл болсон “City Lights” киног нэрлэсэн нь бий.

1930-1940 оны үед тэрбээр кино зохиол бичихээ больж, найруулагчийн ажилд түлхүү татагдан оржээ. 1950-иад оны эхэн үеэр Чарли Чаплин уран бүтээлдээ улс төр, нийгэм, шашны үзэл суртлын асуудлыг хөндөх болсон нь америкчуудын дургүйцлийн хүргэх болжээ. Ийнхүү шүүжлэлд өртөж эхлээд байсан Чарли Чаплин бизнесийн орлогоо нэмэгдүүлэх үүднээс ажилтнуудаа олноор халж буй эрхмийн талаар кино бүтээсэн нь байдлыг улам бүр хурцатгаж байв.

Улмаар АНУ-ын төлөөлөгчдийн тэнхим эх орныг нь гутаан доромжилсон хэмээн Чарли Чаплиныг нээлттэй сонсголд дуудсан ч тэрбээр Трампын дүрээрээ оролцоно гэж мэдэгдсэн тул уг үйл ажиллагааг цуцалж байжээ. Үүгээр ч зогсохгүй түүнийг капитализмыг эсэргүүцэгч, коммунист үзэлтэн хэмээн нийгэм даяар буруушааж, “Чаплин бол социалист үзэлтэн”, “Чаплиныг ЗХУ руу илгээ” гэх сүржин гарчигтай нийтлэлүүд цуварч байсан түүхтэй.

Түүнчлэн Жоан Берри гэгч бүсгүй Чаплины хүүхдийг төрүүлсэн хэмээн алдарт жүжигчнийг шүүхэд өгсөн агаад цусны шинжилгээгээр Чарли Чаплины хүүхэд биш гэдэг нь ил болсон ч тус хэрэгт холбогдох шүүх хоёр жилийн турш үргэлжилсэн гэдэг. Ийнхүү АНУ-д социалист дэглэмийг баримтлагч гэх нэр зүүсэн Чарли Чаплин Европ тивд эргэн ирж, Женев хотод дөрөв дэх эхнэр Юүжин Онил болон хүүхдүүдийн хамтаар суурьшжээ.

Алдарт жүжигчний амьдралын сүүлийн он жилүүд ийнхүү баяр баясал дүүрэн өнгөрсөн бөгөөд 1977 онд 88 насандаа тэрээр Швейцарийн Женев хот дахь гэртээ зуурдаар нас нөгчсөн байна.

Оршуулгын ёслолын дараа Чарли Чаплины цогцсыг гэмт этгээдүүд хулгайлж, гэр бүлээс нь 400,000 ам.доллар шаардаж байсан ч төд удалгүй хэрэгтнүүд баривчлагдаж, шарилыг Меруц дахь Корси-Сур-Вивей дэх оршуулгын газарт нутаглуулсан гэдэг.