“Disney” болон “Marvel”-ын хамтарсан бүтээл “Thunderbolts*” кино өнгөрсөн долоо хоногт нээлтээ хийсэн. Тэгвэл тус кино АНУ-д амралтын өдрүүдэд 76 сая ам.долларын орлого олж, 2025 оны хамгийн өндөр нээлтийн орлоготой гурав дахь кино боллоо. Харин олон улсад 162.1 сая ам.долларын орлого олжээ.
“Тавдугаар сар кино салбарын хувьд түүхэн дэх хамгийн амжилттай саруудын нэг болж байна” хэмээн “Comscore” компанийн ахлах шинжээч Пол Дергарабедян мэдэгджээ.
Сүүлийн жилүүдэд “Marvel”-ын кинонууд 2019 оны “Avengers: Endgame” шиг рекорд тогтоох амжилтад хүрч чадахгүй байсан юм. Зарим кино амжилт үзүүлсэн ч, ихэнх нь үзэгчид болон шүүмжлэгчдийн хүлээлтэд хүрч чадаагүй. MCU-ийн хувьд 76 сая ам.доллар дунд түвшний орлого боловч “Thunderbolts*”-ийн хувьд хүчтэй эхлэл гэж шинжээчид үзэж байна.
“Шинэлэг дүрүүдийг нэг дор цуглуулж, үнэнч шүтэн бишрэгчдийн хүрээнээс гадна олон нийтэд хүртээлтэй болгож, шүүмжлэгчид болон үзэгчдээс сүүлийн жилүүдэд байгаагүй сайн үнэлгээ авсан нь Marvel-ийн бүтээлч хүч хэрхэн бүрэн хүчин чадлаар ажиллаж чаддагийн тод жишээ болж байна” хэмээн Fandango-ийн шинжээч Шон Роббинс хэлжээ.
Энэхүү кино нь ‘Minecraft Movie’ болон ‘Sinners’ зэрэг бүтээлтэй адил үзэгчдийн сонирхлыг удаан хугацаанд хадгалж чадах бүтээлүүдийн нэг болох төлөвтэй байна.
