БНСУ-ын алдарт “Blackpink” хамтлаг энэ онд дэлхийн аялан тоглолт хийхээ зарлаад буй. “Deadline” хэмээх энэ оны аялан тоглолт нь тэдний 2022-2023 онд хийсэн “Born Pink”-ийн дараах анхны бие даасан томоохон тоглолт бөгөөд гишүүд удаан хугацаанд бие даасан уран бүтээлээ туурвиж, тусдаа байсны эцэст ийнхүү эргэн нэгдэж байгаа юм.
Аялан тоглолт 2025 оны долдугаар сарын 5-нд Өмнөд Солонгосын Куян хотоос эхэлж, АНУ, Канад улсаас үргэлжлэн Европ мөн Ази тивээр тойрон тайзнаа гарах аж. Азийн бүсэд тоглолтын тоо хязгаарлагдмал байгаа ч “YG Entertainment”-аас цаашид нэмэлт тоглолтууд зарлагдах боломжтойг мэдэгдсэн.
Тэгвэл Монгол шүтэн бишрэгчдэд хамгийн ойр тоглолтууд нь Өмнөд Солонгосын Куян хот болон Хонконг, Токио, Сингапур зэрэг хотод зохион байгуулагдана. Ази тивийн тоглолтын тасалбарын үнэ хараахан тодорхой болоогүй ч АНУ болон Европын үнээс үндэслэн үзэхэд энгийн тасалбар 95-180 ам.долларын хооронд байгаа бол VIP тасалбарын үнэ 350-750 ам.долларын хооронд байх төлөвтэй байна.
Тасалбарын борлуулалт, суудлын төлөвлөгөө зэрэг дэлгэрэнгүй мэдээллийг “Blackpink”-ийн албан ёсны вэбсайт болон тухайн орны албан ёсны тасалбар борлуулагчдын сайтаас авах боломжтой. Тасалбарын борлуулалт энэ сараас нээгдэх аж.
