1.3 метр өндөртэй Labubu цуглуулгын тоглоом Бээжингийн дуудлага худалдаагаар 1.08 сая юаниар ($150,275.51) зарагдаж, “blind box” тоглоомын шинэ дээд амжилт тогтоолоо.
Энэхүү дуудлага худалдааг Yongle International Auction зохион байгуулсан бөгөөд тус компани орчин үеийн урлаг, гоёл чимэглэлийн дуудлага худалдаагаар дагнан үйл ажиллагаа явуулдаг. Харин энэ удаад дэлхийн өнцөг булан бүрт алдаршиж буй Хятадын Pop Mart тоглоомын компанийн “Labubu” хүүхэлдэйн зориулсан анхны дуудлага худалдааг амжилттай зохион байгуулжээ.
Дуудлага худалдаанд 48 багц зүйл худалдаалагдаж, ойролцоогоор 200 хүн хүрэлцэн ирж оролцсон бол, 1000 гаруй хүн цахимаар Yongle-ын гар утасны аппликэйшнээр дамжуулан үнэ хаялцжээ. Бүх багцын эхлэх үнэ 0 байсан ч нийт 3.73 сая юанийн орлого олжээ. Хамгийн өндөр үнээр зарагдсан зүйл бол 1.3 метр өндөртэй, ногоон өнгийн Labubu байсан бөгөөд уг дүрс дэлхийд ганцхан бий аж.
Labubu нь ихэвчлэн “blind box” буюу багцыг нээж үзэх хүртэл доторх зүйл тодорхойгүй тоглоом байдлаар борлуулагддаг.
