Сүүлийн үед БНХАУ-д насанд хүрэгчдийн зориулалттай соск хэрэглэх хүмүүсийн тоо нэмэгдэж, олон нийтийн сүлжээнд халуун сэдэв болоод байна. Хятадын “Sina Weibo” цахим сүлжээнд энэ талаарх хаштагтай контентыг 68 сая гаруй удаа үзэж, хэлэлцүүлэг өрнөжээ.
Хятадын “Taobao” цахим худалдааны платформ дээрх хамгийн эрэлттэй насанд хүрэгчдийн соск нь нэгж нь 15.90 юань (2.20 ам.доллар) үнэтэй бөгөөд 10,000-аас дээш ширхэг борлогджээ. Үнэ нь 8.90-85.90 юань хооронд хэлбэлздэг. Эдгээр соскны урт нь 4.5 см бөгөөд 6 сар хүрээгүй нярайд хэрэглэдэг 2.5 см-ийн соскноос илүү урт байна.
Соск хэрэглэх нь янз бүрийн ашиг тустай гэж зарим хэрэглэгчид үзэж байна. Тэдгээрийн зарим нь тамхи татах, хэт их амттан идэх зэрэг зуршлаас салгах, нойрны чанарыг сайжруулах, түгшүүрийг багасгахад тусалдаг гэжээ. Мөн шүдээ хавирах, хурхирахыг зогсоох зорилгоор худалдан авсан тохиолдол ч байгаа аж.
Хятадын нэгэн хэрэглэгч соск нь байнга амттан идэх, их ярих зуршлаас нь салгаж, жин буурахад болон сэтгэл санаа тайвшрахад тус болсон гэж ярьжээ.
Гэвч мэргэжилтнүүд урт хугацаанд хэрэглэх нь эрүүл мэндэд сөрөг нөлөө үзүүлж болзошгүйг анхааруулж байна.
