OI энтертайнмент, VOO-тэй хамтран “No Rules” олон ангит киног 2021 онд бүтээсэн нь нээлтээ хийснээсээ хойш үзэгчдийн анхаарлыг ихэд татаж, эхний ангиасаа л шуугиан тарьсан. Эл кинонд хууль, дүрэм журамтай боловч хууль сахиулах хүчнийхэн мөнгөтэй хүмүүсийн талд үйлчилдэг, гэмт хэргийн бүлэглэлүүд хүчирхэгжсэн Эрдэс хот болон хилс хэргээр баривчлагдсан Хүлэгийн эсрэг талд хар тамхи, хориотой наймаа, авлигын мафи байх бөгөөд үнэн, шударга ёсны төлөөх тэмцэл хурцаар өрнөж, дүрэмтэй хэрнээ дүрэмгүй Эрдэс хотын гэмт бүлэглэлийн эсрэг мөрдөгч Хангай, хэлмэгдсэн Хүлэг нар хамтран тэмцэж буйг өгүүлдэг.
Түүнчлэн тус уран бүтээлийнхээ дараагийн бүлгийг “No Rules-2: New world” хэмээн нэрлэж, 2023 онд толилуулсан. Эл бүлэгт Эрдэс хотод шинэ хотын дарга ирэх боловч тэрбээр шударга ёсыг тогтоохоор биш, өөрийн эрх ашгийн төлөө ирэх бөгөөд мөрдөгч Хангай Эрдэс хотод шударга ёс тогтоохын төлөө тэдний эсрэг тууштай тэмцэж буй талаар гардаг.
Тэгвэл эл цувралын гуравдугаар бүлэг “No Rules-3: History” наймдугаар сарын 28-наас VOO-гээр олны хүртээл болох гэж байна. Энэ бүлэгт Эрдэс хотын гэмт хэрэг, дүрэмгүй тоглоомын шинэ тоглогчдын талаар өгүүлнэ.
Цувралын нэг, хоёрдугаар бүлгийг наймдугаар сарын 16-наас өдөр бүр, гуравдугаар бүлгийг наймдугаар сарын 30-наас “Монгол HD” телевизээр үзэх боломжтой.
