Оросын кино, телевизийн жүжигчин Аглая Тарасова Москвагийн Домодедово нисэх онгоцны буудал дээр саатуулагдаж, мансууруулах бодисын хууль бус наймааны хэргээр буруутгагдсан байна. “Жүжигчний цахилгаан тамхины бортогоноос каннабисын тос илэрсэн гэж үзэж байна” хэмээн нэрээ нууцалсан нэгэн хууль сахиулах байгууллагын эх сурвалж төрийн мэдлийн ТАСС агентлагт ярьжээ. Харин өөр нэг эх сурвалж РИА Новости агентлагт өгсөн мэдээлэлдээ, илэрсэн каннабисын тосны хэмжээ 0.38 грамм байсан гэжээ.
Мөрдөн байцаагчид Домодедовогийн хотын шүүхэд Аглая Тарасоваг гэрийн хорионд байлгах хүсэлт гаргасан тухай “Коммерсант” сонин мэдээлэв. Аглая Тарасова нь олон ангит “Interns” хэмээх телевизийн цуврал болон 2017 оны уран гулгалтын сэдэвтэй романтик “Ice” кинонд тоглосноороо олонд танигдсан. Хэрэв буруутай нь тогтоогдвол тэрбээр долоо хүртэлх жилийн хорих ял авч болзошгүй.
Жүжигчний баривчлагдсан огноо тодорхойгүй хэвээр байна. Оросын хууль сахиулах байгууллагуудтай холбоотой Телеграм сувагт жүжигчин “хоёр хоногийн өмнө” саатуулагдсан гэж баасан гаригт (2025.09.05) мэдээлсэн байна. Харин хэвлэл мэдээллийн зүтгэлтэн Ксения Собчакийн мэдээний платформ “Осторожно Новости” түүнийг наймдугаар сарын 28-нд Тель-Авиваас буцаж ирээд гаалийн шалгалт нэвтрэх гэж байхдаа баривчлагдсан хэмээн мэдээлжээ. Аглая Тарасова бол Оросын нэрт жүжигчин бөгөөд Украинд хийсэн довтолгоог олон нийтийн өмнө эсэргүүцсэн Ксения Раппопортын охин юм.
