Жил бүр “Forbes” сэтгүүлээс танилцуулдаг АНУ-ын хамгийн чинээлэг хүмүүсийн жагсаалтыг “Tesla”, “SpaceX” компанийн үүсгэн байгуулагч Илон Маск дөрөв дэх жилдээ тэргүүллээ.
Мөн тэрбээр нийт хөрөнгийн хэмжээ нь 400 тэрбум ам.долларыг давсан анхны хүн болжээ. Жагсаалтыг гаргах үеийн байдлаар түүний хөрөнгө 428 тэрбум ам.доллароор үнэлэгдсэн байна. Энэ нь өнгөрсөн оны үзүүлэлттэй харьцуулахад 184 тэрбум ам.доллароор нэмэгдсэн бөгөөд “Tesla” компанийнх нь хувьцааны үнэ 56 хувиар өсчээ.
Жагсаалтын хоёрдугаарт технологийн “Oracle” компанийг хамтран үүсгэн байгуулагч, захирлуудын зөвлөлийн дарга Ларри Эллисон оров. Түүний хөрөнгө 276 тэрбум ам.доллароор үнэлэгджээ. “Oracle” компанийн хувьцаа 60 хувиар өссөнөөр түүний хөрөнгө энэ онд 101 тэрбум ам.доллароор нэмэгдсэн байна.
Харин “Meta” корпорацыг хамтран үүсгэн байгуулагч Марк Цукерберг Америкийн хамгийн чинээлэг эрхмүүдийн жагсаалтын гуравдугаарт бичигджээ. Жагсаалтыг гаргах үед түүний хөрөнгө 253 тэрбум ам.доллароор үнэлэгджээ. “Meta компанийн хувьцааны үнэ он гарснаас хойш 42 хувиар өсжээ.
Дөрөвдүгээрт, “Amazon” компанийг үүсгэн байгуулагч Жефф Безос (241 тэрбум ам.доллар), тавдугаарт, “Google” компанийг хамтран үүсгэн байгуулагч Ларри Пейж (179 тэрбум ам.доллар) багтав.
