Японы Осака мужид хүнд шилжүүлэн суулгах зорилгоор гахайн эрхтнүүдийг ургуулдаг фермерийн аж ахуйг нэгэн гарааны компани байгуулжээ.
Тус компани АНУ-ын биотехнологийн компанитай хамтран энгийн гахайн эсийг хувилах аргаар гахайг үржүүлэхээр төлөвлөж байгаа аж.
Тэд эхлээд биологийн материалын генийг хувирган өөрчилж, шилжүүлэн суулгасны дараа өвчтөний дархлааны тогтолцоо эрхтэнг хүлээж авахгүй байх эрсдэлийг багасгах юм. Уг ферм 2027 он гэхэд ажиллаж эхлэх бөгөөд жилд 100 орчим гахай үржүүлэхээр төлөвлөж байна.
Гахайн эрхтэнүүд хэмжээ, бүтцээрээ хүний эрхтэнтэй тун ойролцоо тул эрхтэн шилжүүлэн суулгах мэс засалд донор эрхтэн дутагдалтай байгаа нөхцөлд тэдгээрийг ашиглах боломжтой гэжээ.
Өнгөрсөн хоёрдугаар сард Японы эрдэмтэд эрхтнүүдийг нь төрөл зүйл хооронд, тэр дундаа хүнд шилжүүлэн суулгахад тохиромжтой, АНУ-д гарган авсан гахайг анх удаа эсийн аргаар амжилттай хувилжээ.
Судлаачид мөн анх удаа гахайн бөөрийг сармагчинд амжилттай шилжүүлэн суулгасан байна.
