“Disney”-ийн “Zootopia 2” кино мягмар гараг /2025.11.25/-ийн урьдчилсан үзвэрээр 10.2 сая ам.долларын орлого олж, “Disney Animation Studios”-ийн түүхэнд хамгийн өндөр урьдчилсан орлоготой хоёр дахь бүтээл боллоо.
Бокс оффисын шинжээчид тус кино Талархлын баярын таван өдрийн хугацаанд 135–150 сая ам.долларын орлого олох төлөвтэй гэж тооцоолжээ.
Хэдийгээр энэхүү тооцоолол нь өмнөх оны мөн үед “Moana 2”-ын олсон 225.4 сая ам.долларын орлогоос нэлээд доогуур үзүүлэлт боловч сүүлийн хэдэн сар тасалбарын борлуулалт сул байсан зах зээлд чухал сэргэлт авчирна гэж үзэж байна.
“Comscore”-ийн зах зээлийн чиг хандлагын албаны тэргүүн Пол Дергарабедиан “Zootopia 2” анимейшн нээлтийн товоо төгс тааруулсан, олон танигдсан брэнд ба гэр бүлд чиглэсэн PG ангилал нь орлогоо нэмэгдүүлэх том давуу тал болно хэмээв.
Үүний зэрэгцээ “Universal”-ийн “Wicked: For Good” мөн өрсөлдөөнд голлох байр суурь эзэлж буй. Тус кино өнгөрсөн долоо хоногт нээлтээ хийсэн даруйдаа 147 сая ам.доллар төвлөрүүлсэн бөгөөд Талархлын баяраар мөн 80–100 сая ам.долларын нэмэлт орлого олох хүлээлттэй байна.
