Korea Culture and Tourism Institute болон Жэжү мужийн захиргааны мэдээлснээр, энэ оны 1-ээс 9 дүгээр сарын хооронд Жэжү аралд ирсэн гадаадын жуулчдын тоо өнгөрсөн оны мөн үеэс 17.5 хувиар өсөж, 1.74 саяд хүрчээ. Энэ талаар “Korea Herald” сонин мэдээлсэн байна. Энэхүү өсөлт нь цар тахлын дараах аялал жуулчлалын салбарын тогтворгүй сэргэлт, дотоодын аяллын урт хугацаанд үргэлжилсэн бууралтын дараа гарсан эерэг мэдээлэл байлаа.
Орон нутгийн эрх баригчид уг өсөлтийн гол шалтгааныг “Нэтфликс”-ийн “When Life Gives You Tangerines” нэртэй цувралтай холбон тайлбарлажээ. Уг цуврал нь Жэжү арал даяар зураг авалтаа хийж, загасчны тосгодын өдөр тутмын амьдралыг харуулдаг. Нийт 16 ангитай, дөрвөн хэсгээс бүрдэх энэхүү цуврал нь Жэжүд төрж өссөн О Э Сүн болон Ян Гван Шик нарын олон арван жилийг дамнасан харилцааг өгүүлдэг. Цувралын үйл явдал голчлон Жэжүгийн загасчны тосгодод өрнөх бөгөөд эмэгтэй чөлөөт шумбагчид болох хаэнёо, үе дамжсан гэр бүлийн холбоо, арлын улирлын өөрчлөлтийг онцлон харуулжээ.
Лав чулуун эрэг, рапс цэцгийн (canola) талбай, ЮНЕСКО-д бүртгэгдсэн Сонсан Илчульбон галт уулын тогооны орчимд зураг авалтаа хийсэн уг бүтээл 190 улсад нэгэн зэрэг цацагдсан. Тус цуврал нь “Нэтфликс”-ийн англи бус хэл дээрх бүтээлийн дэлхийн чансааг тэргүүлж, Жэжүгийн байгаль, соёлыг гадаадын шинэ үзэгчдэд таниулсан хэмээн үнэлэгдэж байна. Мөн шүүмжлэгчид, үзэгчдээс өндөр үнэлгээ авсан бөгөөд цацагдаж байх үедээ Rotten Tomatoes дээр шүүмжлэгчдийн 100%, үзэгчдийн 98%-ийн үнэлгээтэй байжээ.
Өнгөрсөн гуравдугаар сард Хятадын төрийн харьяалалтай “Global Times” сонин уг драмыг “Солонгосын үе үеийн драмуудын дундах шинэ хит” хэмээн магтаж, “DouBan” платформ дээр 9.4 үнэлгээ авсан нь сүүлийн жилүүдэд Солонгос цувралуудаас хамгийн өндөр үзүүлэлт болсон гэж онцолсон байна. Энэ нь Хятадын Солонгос соёлын бүтээгдэхүүнд тавьсан удаан хугацааны хязгаарлалтыг (“Халлюгийн хориг”) сулруулах дохио байж магадгүй гэсэн таамгийг ч дэвшүүлжээ.
Жуулчлалын тоо баримтаас харахад энэхүү нөлөө түр зуурынх бус, тогтвортой үргэлжилж байна. Korea Culture and Tourism Institute-ийн мэдээлснээр, БНСУ-д ирсэн нийт гадаадын жуулчдын дунд Жэжүд зорчсон жуулчдын эзлэх хувь энэ жил дараалан гурван улирал өсч, эхний улиралд 8.9%, хоёрдугаар улиралд 9.0%, гуравдугаар улиралд 10.5% болжээ.
