УДЭТ-ын уран бүтээлчид Оросын нэрт зохиолч Лев Толстойн “Анна Каренина” романаас сэдэвлэсэн ижил нэрт жүжгийг 2020 онд Монголын үзэгчдэд анхлан хүргэж байв.
“Анна Каренина” роман нь дэлхий дахинаа эмэгтэйчүүдийн заавал унших ёстой сонгодог бүтээлд тооцогддог. Эмэгтэй хүний эмзэг нандин чанар, хайр сэтгэлийн төлөөх тэмцэл болоод гэр бүл, хосын харилцаа, амьдралын тухай өгүүлэх энэхүү романыг жүжгийн зохиол болгон Н.Пүрэвдагва бичсэн бол Төрийн соёрхолт, Урлагийн гавьяат зүтгэлтэн Н.Наранбаатар найруулж, зураачаар УДЭТ-ын ерөнхий зураач Т.Ганхуяг, хөгжмийн зохиолчоор Ш.Өлзийбаяр нар ажилласан.
Түүнчлэн хоёр бүлэг, 23 үзэгдэлт уг жүжгийг УДЭТ шинэ бүрэлдэхүүн, шинэ “Анна”-тайгаар өнгөрсөн оны тавдугаар сард үзэгчдийн хүртээл болгосон юм. Тэгвэл эл жүжгээ ирэх хоёрдугаар сарын 11-нээс эхлэн таван удаа дахин толилуулахаар болжээ.
Харин энэ удаа “Анна Каренина” жүжгийн Анна (Хувь заяа)-гийн дүрд ОХУ-ын алдарт жүжигчин Алёна Юрьевна Байбородина (Буриад Улсын Гавьяат жүжигчин) тоглох аж.
Жүжигчин Алёна Юрьевна Байбородина нь Ф.М.Достоевскийн “Гэм зэм” жүжгийн Дуня, А.Н.Островскийн “Мэргэн хүнд мунхаглал бий” жүжгийн Глафира Глумова, С.Лобозеровын “Байгалийн энгэрт өрнөх бяцхан жүжиг”-ийн Купавина зэрэг дүрүүдэд тоглосон туршлагатай жүжигчин юм.
“Анна Каренина” жүжгийн бусад гол дүрүүд буюу Анна Каренинад О.Хонгорзул, Алексей Вронскийд Т.Сэргэлэн, Алексей Каренинд И.Дашнамжил, Кити Щербацкаяд Ц.Цэлмэг, Степан Облонскийд Гавьяат жүжигчин О.Гэрэлсүх, Варя Вронскаяд Гавьяат жүжигчин Ц.Баясгалан, Бетси Тверскаяд М.Тогтохжаргал, Константин Левинд Б.Шинэбаяр, Щербацкий ванд Хөдөлмөрийн баатар, Ардын жүжигчин П.Цэрэндагва, Щербацкая хатагтайд Ардын жүжигчин Ж.Оюундарь нар тоглоно.
