МЗЭ-ийн болон Г.Сэр-Одын нэрэмжит шагналт зохиолч, яруу найрагч Э.Эрдэнэдалайн “Салхины дэргэд…” /Зэл-Үг/ түүвэр номын нээлт Г.Занабазарын нэрэмжит Дүрслэх урлагийн музейд энэ сарын 6-нд болов.
Зохиолч уг бүтээлээ Соёлын гавьяат зүтгэлтэн, Д.Нацагдоржийн нэрэмжит шагналт, “Болор цом”-ын эзэн яруу найрагч А.Эрдэнэ-Очирын дурсгалд өргөж, номын өмнөтгөлийг Төрийн соёрхолт, Ардын уран зохиолч, Соёлын гавьяат зүтгэлтэн Б.Догмид “Шанзны эгшигнээс салхи нь гарна…” хэмээн бичиж ариутган шүүжээ.
Яруу найрагч Э.Эрдэнэдалай хөрвүүлэг, судалгаа, ойн, сэтгүүл зүй, түүх, антологи, хамтын болон хүүхдийн бүтээл зэрэг 100 гаруй номд редактор, эрхлэгч, оролцогчоор ажилласан туршлагатай уран бүтээлч юм.
Түүний “Хуучин дэлхий”, “Миний БУДДА” яруу найргийн түүврүүд, “Маргаашийн намтар” нэхэн тэмдэглэл, сэрэг дурсамж, портрейт бүтээл, мөн “Салхины дэргэд…” түүвэр нь уншигчдын хүртээл болоод байна.
Энэхүү “Салхины дэргэд…” номыг кирилл болон монгол үндэсний бичгээр зэрэгцэн хэвлэж, утга соёлын өвийг эрхэмлэсэн онцлогтой уншигч олонд хүрч буй юм.
