Хүүхэд, залуучуудад соёл, урлагийн боловсрол олгох, дэлхийн түвшний уран бүтээлийг таниулах, орон нутгийн соёлын хүртээмжийг нэмэгдүүлэх зорилготой “Wanderlust Mongolia” олон улсын нүүдлийн театрын наадам дөрөвдүгээр сарын 19-нөөс эхлэн Булган аймгийн сумдаар зохион байгуулж байна.
Наадмын хүрээнд дотоод, гадаадын уран бүтээлчид оролцож, театрын урлагийн шилдэг бүтээлүүдийг орон нутгийн хүүхэд, багачуудын хүртээл болгож байна. Эхний тоглолтууд Бүрэгхангай суманд амжилттай зохион байгуулж, хүүхэд багачуудын талархлыг хүлээжээ.
Тус суманд Улаанбаатар хотын Рома театрын “Цасан хүн” жүжиг, Эрдэнэт хотын Хүүхэд, залуучуудын театрын “Бидний үлдээсэн мөр” болон Италийн уран бүтээлчдийн “Faces Under Sky” зэрэг бүтээлийг үзэгчдэд толилууллаа.
“Wanderlust Mongolia” олон улсын нүүдлийн театрын наадам 4 дүгээр сарын 19-24-ний өдрүүдэд үргэлжилж, Булган аймгийн бүх сумын хүүхэд, багачуудын хүртээл болж, тэдэнд соёл, урлагийн боловсрол олгох зорилгоор хүрч ажиллана.
Булган аймгийн хэмжээнд ерөнхий боловсролын 22 сургууль, сургуулийн өмнөх боловсролын 22 байгууллагад нийт 14,082 хүүхэд суралцаж, хүмүүжиж байна. Тэдний оюун санаа, сэтгэлгээний ертөнцийг тэлэх зорилгоор дэлхийн театрын уран бүтээлчид тав хоногийн турш орон нутагт ажиллаж байна.
