Стресс, сэтгэлзүйн ачааллаа бууруулахад хүмүүс ямар хөгжим сонсдог вэ гэх асуултад эрүүл мэндийн програм хангамж хөгжүүлэгч “Tebra”-гийн хийсэн шинэ судалгаа энэ асуултад тодорхой хариу өгч, “Linkin Park” хамтлагийг стресс тайлахад хамгийн тохиромжтой, шилдэг уран бүтээлчээр нэрлэсэн байна.
Мянга гаруй оролцогч стресс болон “хэт ачаалалтай” үедээ ямар хөгжим сонсдог талаар асуулга бөглөсөн бөгөөд 150 мянга гаруй дууг энэхүү судалгааны явцад шинжилсэн юм байна. Үүнээс гадна судлаачид 560 гаруй стресс тайлах плэйлист, сэтгэлзүйн эрүүл мэндийн холбогдолтой плейлистүүд доторх 155,626 дууны өгөгдлийг шинжилжээ.
Судалгааны дүнгээр тодорхой төрлийн дуу, хөгжмийн хэв маяг хүмүүс сэтгэлээ тайвшруулах үед тогтмол давтагдан гарч ирдэг нь ажиглагдсан байна. Оролцогчдын 35 хувь нь стрессээ тайлах гол арга нь хөгжим гэж хариулсан нь хамгийн өндөр үзүүлэлт байв. Мөн судалгаанд оролцогчдын 72 хувь нь “хөгжим сонсох нь сэтгэлзүйн байдалд бодитоор эерэг нөлөө үзүүлдэг” гэж хариулсан байна.
Стрессийн үед хамгийн их сонсогддог уран бүтээлчдийн жагсаалтыг “Linkin Park” хамтлаг тэргүүлжээ. Тус судалгаанд рок, метал хамтлагууд давамгайлсан бөгөөд плэйлистийн дата шинжилгээгээр стресс тайлах жагсаалтад “Radiohead”, “Deftones”, “Linkin Park” хамтлагууд хамгийн олон давтагдсан байна. Харин метал урсгалаас “Alice in Chains”, “Slipknot”, “Metallica” нар багтжээ.
Судлаачдын үзэж байгаагаар рок жанрын хөгжим нь сэтгэл хөдлөлийг гадагшлуулах, дотоод бачуурлыг “суллах”, сонсогчдод ойлгогдож буй мэдрэмж төрүүлэх зэрэг сэтгэлзүйн нөлөө үзүүлдэг байна.
