Түүнчлэн тэрбээр 2011 оноос Японы хүндэт хатан хаан Мичикогийн хувцас дизайныг хариуцаж ирсэн бөгөөд 2023 оноос хүндэт эзэн хаан болон хатан хааны хувцас дизайныг давхар гардан ажиллаж байна. Түүний амжилтууд үүгээр үл хязгаарлагдаж 2025 онд ANA буюу “All Nippon Airways” авиа компани 75 жилийн ойдоо зориулан нислэгийн багийн дүрэмт хувцсыг 37 жилийн дараа ахин шинэчлэх шийдвэр гаргасан бөгөөд эл чухал ажлыг Такизавад даатгажээ.
2007 онд Наоки Такизаваг Франц улсын урлаг, утга зохиолын Шевалье цолоор шагнадаж, 2009–2013 онд Токиогийн их сургуулийн “Intermediatheque” музейн тусгай профессор, 2011–2013 онд Васэда их сургуулийн соёл, медиа, нийгмийн сургуульд цагийн багшаар тус тус ажиллажээ. Харин 2025 оноос тэрбээр Бээжингийн Хувцас загварын технологийн их сургуулийн Загварын урлаг, инженерчлэлийн тэнхимийн зочин профессороор ажиллаж байна.
Ийнхүү дэлхийн хэмжээний брэндүүд хийгээд эзэн хааны ордон, академик орчин гээд дизайны олон өөр талбарт өөрийн гарын үсгийг үлдээсэн Наоки Такизавагийн дараагийн бүтээлч аялал Монголын ноолууртай огтлолцож байна.
Энэ сард “Говь” брэнд нь загвар зохион бүтээгч Наоки Такизаватай хамтран ажиллаж буйгаа албан ёсоор зарласан бөгөөд уг хамтралын хүрээнд эх орны үнэ цэнтэй өв болох ноолууран бүтээгдэхүүнийг орчин үеийн амьдралын хэв маягт нийцүүлэн дахин шинэчлэн загварчилж, “Mininam, Everyday, Active” гэсэн тодотголтой шинэхэн бүтээлүүдийг танилцууллаа.
“Бидний хамтын ажиллагаа хил хязгаар, соёлын хүчин зүйлийг давж, хүн бүрийг холбосон цоо шинэ үнэ цэнийг бий болгоно гэдэгт итгэж байна” хэмээн Наоки Такизава онцлон хэллээ.
Эх сурвалж: Buro247.mn
