Кино урлагийн зөвлөлийн төлөөлөл, Монголын Анимейшн холбооны гүйцэтгэх захирал Э.Тамир нар Япон Улсын Засгийн газрын Соёлын хэрэг эрхлэх агентлагийн Урлаг, соёлын хэлтэсийн ахлах мэргэжилтэн Тамура Жун-Яа болон Кино урлагийг дэмжих чиглэлээр үйл ажиллагаа явуулж буй Unijapan байгууллагын Гүйцэтгэх захирал Икэда Каори, Олон улсын сурталчилгаа хариуцсан менежер Комацу Мачико нартай уулзалт зохион байгууллаа.
Уулзалтаар Монголын Анимейшн салбарын танилцуулгыг хийж, салбарын хөгжил, цаашдын алсын хараа боломжууд болоод энэ жил 3 дахь удаагаа зохион байгуулагдах “Анимо” анимейшн наадмын талаар мэдээлэл хүргэлээ.
Монгол уран бүтээлчид сүүлийн жилүүдэд аниме, манга бүтээх чиглэлд түлхүү сонирхолтой байгаа ба үүгээр дамжуулан уран бүтээлчдийг хөгжүүлэн бэлтгэх, соёлын болоод эдийн засгийн эргэлтэд оруулан бүтээгдэхүүн болгон Олон улсад гаргах боломжтойг онцлон ярилцлаа.
Цаашлаад Токиогийн Олон улсын кино наадмын дэргэдэх Tokyo Gap-Financing market үйл ажиллагаанд Монгол төслүүдийг оролцуулах, Токио хот дахь Анимейшн чиглэлд үйл ажиллагаа явуулж буй томоохон компаниудтай харилцаа холбоо тогтоох, албан уулзалтуудыг зохион байгуулахад дэмжлэг үзүүлэхээр болсон юм.
