Монгол Улсын Гавьяат жүжигчин Д.Алтанхуягийг УДБЭТ-ын захирлаар эргүүлэн томилжээ. Тэрбээр энэ талаар өөрийн цахим хуудсаар дамжуулан мэдээлэв. “Энэ бол миний хувьд албан тушаалын тухай бус, харин урлаг соёлын төлөө хүлээсэн үүрэг хариуцлага, итгэл найдварын үргэлжлэл юм. Амьдралынхаа ихэнх хугацааг зориулсан энэ сайхан байгууллага, уран бүтээлчид, хамт олон, үзэгч түмэндээ үйлчлэх эрхэм боломжийг дахин олгосонд талархаж байна” гэжээ.
Эргэн сануулахад, Соёл, спорт, аялал жуулчлал, залуучуудын сайдаар Ч.Номинг ажиллаж байх үед буюу 2024 оны аравдугаар сард түүнийг УДБЭТ-ын захирлын албан тушаалд түр томилсон. Харин дараагийн сайд Ч.Ундрамын үед чөлөөлсөн байдаг. Улмаар Д.Алтанхуяг өөрийг нь үндэслэлгүйгээр ажлаас нь чөлөөлсөн гэж үзэн салбарын сайдыг Захиргааны хэргийн шүүхэд өгсөн. Нийслэл дэх Захиргааны хэргийн анхан шатны шүүх түүнийг ажлаас чөлөөлсөн тушаалыг хүчингүйд тооцсон юм. Ийн тэрбээр Ж.Алдаржавхлан сайдын үед эргэн томилогдож байна.
