Алдарт жүжигчин Л.Жамсранжавын охин, Монгол Улсын Ардын жүжигчин Ж.Оюундарь 1968 оны энэ өдөр Улаанбаатар хотод мэндэлжээ. Тэрбээр СУИС-ийг “Гарын таван хуруу”-ны Шагдар нэрээрээ олонд хоногшсон Гавьяат жүжигчин Л.Лхасүрэн багшийнхаа удирдлагад төгссөнөөсөө хойш Монголдоо л ганц академик театртаа үнэнчээр ажиллаж яваа.
Түүнийг УДЭТ-ын 1989 оноос хойш үзэгчдэд хүргэсэн бараг бүх л жүжгийн гол болон туслах дүрд тоглосон гэхэд хол зөрөхгүй. Театрын урлагийн шилдгийг тодруулдаг “Гэгээн Муза” наадмын дөрвөн удаагийн шагналт, ОХУ-ын “Ламбушка” театрын наадмын тэргүүн байрын эзэн тэрбээр зөвхөн театрын тайзнаас 80 гаруй өөр өөр дүрээр үзэгчидтэй “уулзаад” байна. Харин дэлгэцийн уран бүтээлүүдийг нь жагсаавал нэлээд урт жагсаалт хөвөрнө. Аймшгийн, адал явдалт, түүхэн, инээдмийн, уянгын гээд түүнд тоглож үзээгүй киноны төрөл ч үлдээгүй.
Авьяаслаг, хайр татам жүжигчиндээ төрсөн өдрийн мэнд хүргэе.
