Хөвсгөл аймгийн ИТХ-ын ээлжит бус XIV хуралдаан даваа гараг /2026.07.06/-т боллоо. Хуралдаанаар Алаг-Эрдэнэ сумын Соёлын төвийг Дашийн Цэрэндарьзавын нэрэмжит болгох асуудлыг хэлэлцэж, төлөөлөгчдийн 100 хувийн саналаар дэмжжээ.
Дашийн Цэрэндарьзав 1945 онд Хөвсгөл аймгийн Алаг-Эрдэнэ суманд төрсөн. Тэрбээр 1967 онд Улсын багшийн дээд сургуулийн кино, драмын ангийг жүжигчин мэргэжлээр төгсөж, ажлын гараагаа Улсын драмын театрт эхлүүлэн, гавьяаны амралтад хүртлээ тус театртаа ажилласан юм. Тэрбээр “Үүр цайхын өмнө” жүжгийн Ханд, “Гал хам”-ын Жаргал, “Буяны нүгэл”-ийн Дунжаа, “Алтан түлхүүр”-ийн Мөөмөө, “Хүргэн хүү”-гийн Халтмаа, “Солиот эх”-ийн хадам эх зэрэг тайз, дэлгэцийн 100 гаруй дүрийг бүтээж, Монголын тайз, дэлгэцийн урлагт үнэтэй хувь нэмэр оруулсан уран бүтээлч билээ.
Түүний урлагийн салбарт оруулсан хувь нэмрийг үнэлж 2001 онд Монгол Улсын Гавьяат жүжигчин, 2026 онд Ардын жүжигчин цолоор шагнасан юм.
