Дуучин, жүжигчин IU эрүүл мэндийн асуудлын улмаас ойрын хугацаанд товлогдоод байсан тоглолтууд болон шинэ цомгийн нээлтээ хойшлуулахаар болжээ.
Түүний агентлаг “Edam Entertainment”-аас долдугаар сарын 21-нд мэдэгдэл гаргаж, IU-гийн ирэх саруудын хуваарийг дахин зохицуулж байгаа талаар мэдээлсэн байна. Энэ өөрчлөлтөд түүний зургаа дахь бүрэн хэмжээний цомог болон есдүгээр сард “Goyang Stadium”-д хийхээр төлөвлөж байсан томоохон тоглолт багтаж байна.
Хуваарь өөрчлөх болсон гол шалтгаан нь IU-гийн Patulous Eustachian Tube dysfunction буюу дунд чихийг хамар-залгиуртай холбодог Евстахийн гуурс хэвийн үед хаалттай байх ёстой боловч байнга эсвэл удаан хугацаагаар нээлттэй байдаг эмгэгтэй холбоотой аж. Энэ эмгэгийн үед чихэнд даралт мэдрэгдэх, тавгүй оргих, сонсголын асуудал үүсэх зэрэг шинж илэрдэг. Ялангуяа дуучны хувьд амьд тоглолт, олон цагийн бэлтгэл, тасралтгүй дуулах нь биеийн байдалд нь нэмэлт ачаалал өгөх эрсдэлтэй гэж үзжээ.
